नेकपा (एकीकृत समाजवादी) ले वर्तमान सरकारमा बढीमा तीन जना मन्त्री पाउने सम्भावना छ। मन्त्री हुन आधा दर्जन बढी नेताहरू आकांक्षी छन्।
उपाध्यक्षहरू बेदुराम भुसाल, राजेन्द्र पाण्डे र उपमहासचिव प्रकाश ज्वाला पार्टीको नेतृत्व गरेर सरकारमा जान चाहिरहेका छन्।
चैत ५ गते घनश्याम भुसाललाई महासचिव बनाउँदा वेदुराम भुसाललाई सरकारमा पार्टीको तर्फबाट नेतृत्व गरेर जाने आश्वासन पार्टी अध्यक्ष माधवकुमार नेपालले दिएको बताइन्छ। चैत ५ गतेसम्म वेदुराम एकीकृत समाजवादीका महासचिव थिए।
अर्का उपाध्यक्ष पाण्डेले पनि सशक्त दाबी गरेका छन्। एकीकृत समाजवादीका एक पदाधिकारीका अनुसार भुसालकै नेतृत्वमा सरकारमा जाने सम्भावना धेरै छ।
उपमहासचिव प्रकाश ज्वाला भने पार्टीको तर्फबाट नेतृत्व नपाए पनि सरकारमा जान तयार छन्।
मन्त्री बन्नका लागि यी तीनसहित आधा दर्जनभन्दा धेरैले दाबी गरेका छन्।
भानुभक्त जोशी, किसान श्रेष्ठ, धनबहादुर बुढा, प्रेम आले, मेटमणि चौधरीलगायत छन्। प्रतिनिधि सभामा एकीकृत समाजवादीका १० जना सांसद छन्। एकीकृत समाजवादीका प्रवक्ता जगन्नाथ खतिवडाले अहिलेसम्म सरकारमा पठाउने मन्त्रीको टुंगो नलागेको बताए।
‘हाम्रो पार्टीबाट बेदुराम भुसाल, राजेन्द्र पाण्डे र प्रकाश ज्वालामध्ये एकजनाले पार्टीको नेतृत्व गर्नुहुन्छ। त्यो कुरा पक्का जस्तै हो,’ उनले भने,‘प्रतिनिधि सभा र राष्ट्रिय सभाका सबै सांसदहरूले दाबी गर्नु स्वाभाविक हो। तर कसलाई पठाउने भनेर निर्णय भएको छैन।’
उनले आफूहरूले पाउने मन्त्रालयको संख्यासमेत तय नभएको बताए।
प्रकाशित मिति: आइतबार, चैत १२, २०७९, १३:०७:००
