राष्ट्रिय प्रजातन्त्र पार्टी (राप्रपा) ले उपनिर्वाचन परिचालनका लागि पार्टीबाट संयोजक तोकेको छ।
आज केन्द्रीय कार्यालय धुम्बाराहीमा बसेको पदाधिकारी बैठकले वैशाख १० मा हुने उपनिर्वाचनका लागि तनहुँ १ मा कोषाध्यक्ष निलकण्ठ काफ्ले, चितवन २ मा उपाध्यक्ष विक्रम पाण्डे र बारा २ मा उपाध्यक्ष बुद्धिमान तामाङलाई निर्वाचन कमाण्डर तोकेको प्रवक्ता मोहन श्रेष्ठले जानकारी दिए।
तीन वटै क्षेत्रमा राप्रपाले उम्मेदवारी दिने पनि निर्णय भएको छ।
यस्तै राप्रपाको केन्द्रीय कार्यसमिति बैठक वैशाख २९ र ३० गते काठमाडौंमा बस्ने तय भएको छ। वैशाखमा सातै प्रदेशमा अगुवा कार्यकर्ता भेला गर्ने निर्णयसमेत भएको उनले बताए। वैशाखदेखि नै सक्रिय सदस्यता वितरण अभियानलाई तीव्रता दिइने उनको भनाइ छ। ‘२०८० सालभित्र पार्टीमा २ लाख सक्रिय सदस्य बनाउने लक्ष्य निर्धारण गरिएको छ,’ उनले भने।
साथै पार्टीको राजनीतिक लक्ष्य प्राप्ति र जनजीविकासँग सम्बन्धित विषयमा बैठकले आन्दोलनमा केन्द्रीत हुने गरी छलफल चलाएको छ।
आन्दोलनका विषय र स्वरुप निर्धारण गर्न महामन्त्री धवलशमशेर राणाको संयोजकत्वमा महामन्त्री शरद पाठक र सहमहामन्त्री झनक प्याकुरेल रहेको समिति गठन गरिएको उनले जानकारी दिए।
पार्टीले सबै केन्द्रीय पदाधिकारी तथा केन्द्रीय सदस्यलाई आफ्नो जिल्ला बाहेकका जिल्लामा संगठन सुदृढीकरणका लागि खटाउने निर्णय गरेको छ।
यसरी जिल्लामा खटिने नेताहरूको कार्यक्षेत्र तोक्न अध्यक्ष राजेन्द्र लिङ्देनलाई बैठकले जिम्मेवारी दिएको प्रवक्ता श्रेष्ठले बताए।
प्रकाशित मिति: सोमबार, चैत १३, २०७९, १७:५६:००
