बारामा एक जना पुरूषको हत्या गरी गाडिएको अवस्थामा शव फेला परेको छ।
कोल्हवी नगरपालिका-११ रामपुर्वा टोल बस्ने ४३ वर्षीय परीक्षण चौधरीको हत्या भएको जिल्ला प्रहरी कार्यालयका डिएसपी राजेश थापाले जानकारी दिए।
उनको शव बुधबार बिहान सवा ९ बजे सोही स्थानका सियाराम चौधरीको गोठघर पछाडि फेला परेको हो। प्रहरीले यस घटनामा संलग्न रहेको आरोपमा १४ वर्षीय नाबालकलाई पक्राउ गरी अनुसन्धान अघि बढाएको छ।
डिएसपी थापाका अनुसार मृतक र पक्राउ परेका बालक छिमेकी हुन्। मंगलबार राति उनीहरू दुबै जना गाउँको एक खाजा पसलमा गएका थिए।
त्यहाँ उनीहरूले खाजा र रक्सी खाएका थिए। त्यसपछि उनीहरू घर जानेक्रममा मृतक परीक्षणले ती बालकसँग अप्राकृतिक मैथुन गर्न खोजेको डिएसपी थापाले बताए।
‘त्यस्तो गर्न खोजेपछि सिसौको दाउराले परीक्षणको टाउकोमा हिर्काएर हत्या गरेका रहेछन्,’ उनले भने, ‘हत्यापछि नजिकै खाल्डो खनेर शवलाई गाडेको देखिन्छ।’
भोलिपल्ट बिहान करिब ९ बजेतिर सियाराम चौधरीले आफ्नो गोठ पछाडि खुट्टाका औंलाहरू देखेपछि घटना बाहिरिएको हो। खुट्टाको तीन वटा औंला बाहिर निस्किएको देखेपछि उनले प्रहरीलाई खबर गरेका थिए।
प्रहरीले अनुसन्धान गरी गाडिएको शव घटनास्थलबाट निकालेको हो। त्यस्तै त्यहाँ फेला परेको एउटा चप्पलले नै आरोपित बालकसम्म पुर्याएको डिएसपी थापाले बताए।
उक्त चप्पल कसको हो भन्ने खोज्दै जाँदा ती बालक फेला परेका हुन्।
डिएसपी थापाका अनुसार बालकसँग अप्राकृतिक मैथुन गर्न खोज्दा हत्या भएको हो।
प्रहरीले सिसौको दाउरा, कोदालो, रगत लागेको बोरा, बायाँ खुट्टाको चप्पल, रगत लागेको ज्याकेट, सर्ट र पाइन्ट पनि बरामद गरेको छ।
पक्राउ परेका बालकलाई न्यायिक प्रहरी नियन्त्रण कक्षमा राख्न जिल्ला अदालत बाराबाट अनुमति लिने तयारी भइरहेको प्रहरीले जनाएको छ।
प्रकाशित मिति: बिहीबार, मंसिर १५, २०७९, ०५:३९:०१
