काठमाडौं महानगरपालिकाका मेयर बालेन शाहले मिटरब्याजी पीडितहरूको मागप्रति ऐक्यबद्धता जनाएको बताएका छन्।
मिटरब्याजीविरूद्ध बर्दिबासदेखि ११ दिन हिँडेर काठमाडौं आइपुगेका पीडितहरू सोमबार खुलामञ्चमा पुगेका थिए। तर महानगर प्रहरीले उनीहरूलाई त्यहाँ प्रवेश दिएन।
त्यसबीच महानगर प्रहरी र पीडितबीच धकेलाधकेलको स्थिति बनेको हो।
उनीहरूको मागप्रति ऐक्यबद्धता भएको बताउँदै प्रदर्शनको लागि रत्नपार्कको शान्तिवाटिकामा प्रबन्ध मिलाएको पनि मेयर शाहले बताएका छन्।
‘हिजो ११ दिन हिँडेर काठमाडौं आउने समाचार हेरेपछि महानगरको मेयरको हैसियतले आफ्नो कार्यक्षेत्रमा नपरे पनि मानवताको नाताले काठमाडौं बसुन्जेल पशुपति धर्मशालामा बास र खानाको व्यवस्थापन गर्न हामी तत्पर भएर आज बिहानै उहाँहरूलाई सम्पर्क गरेर हामीले पशुपति जान आग्रह गर्यौं,’ उनले फेसबुकमा लेखेका छन्।
तर पीडितहरू खुलामञ्चमै बस्न खोजेको पनि उनले बताए।
‘उहाँहरू खुलामञ्चमै बस्न खोज्नुभयो। हामीले सम्झाएर रत्नपार्कको शान्तिवाटिकामा आन्दोलन गर्न प्रबन्ध गरेका छौं र उहाँहरूको मागप्रति ऐक्यबद्धता जनाउँदै नेपाल सरकारसमक्ष उहाँहरूको समस्या समाधानको लागि जोडदार माग राख्दछौं,’ उनले भनेका छन्, ‘हामी चाहन्छौं यस्तो अवस्थामा काठमाडौं कोही आउन नपरोस्, गाउँ-गाउँमा सरकार पुगोस्।’
यद्यपि उनले खुलामञ्चमा प्रदर्शन गर्न नदिनुको कारणबारे भने खुलाएका छैनन्।
शाहका स्वकीय सचिव भूपदेव शाहले भने सार्वजनिक स्थलमा बस्न खोजेकाले रोक लगाएको बताए।
'उहाँहरू कहाँ बस्ने हो, त्यो उहाँहरूले नै व्यवस्था मिलाउनुपर्ने कुरा हो,' उनले भने, 'महानगरले धर्मशालामा व्यवस्था मिलाइदिँदा पनि खुलामञ्चमै किन बस्नुपर्यो? हामीले सार्वजनिक स्थानमा बस्न दिन मिल्दैन।'
अहिले पीडितहरू टुँडिखेलको गेटबाहिरै धर्ना दिएर बसेका छन्।
मिटरब्याजविरूद्धको संघर्ष समितिले आयोजना गरेको मार्चमा पीडितहरूले विभिन्न प्लेकार्ड बोकेका छन्।
तमसुक व्यवस्थम खारेज गर, मिटरब्याजीलाई खारेज गर, मिटर ब्याजीको अवैध सम्पत्ति छानबिन गर, झूटा मुद्दामा गिरफ्तार गरिएका पीडितलाई रिहा गरलगायत माग राखेर उनीहरू काठमाडौं आइपुगेका हुन्।
1679916133.jpg)
